SUPERAPROL DO ATRASO!

Postos a escoller entre tradizón e modernidade (dilema encantador), Inseminario decántase radicalmente pola tradizón, e canto máis vella e rancia mellor. En liña coas teorías do ecoloxismo e do decrecemento, recuperar o desbotado (por obsoleto) é o máis innovador.

O noso atraso é un adianto! Máis atrás! Viva a Región Gallega!

Messi-As Mirrinhao

Terapia para militantes "atacaos"

Sufre vostede stress post-asamblea/congreso, considera que os seus compañeiros de organización son uns traidores, apesebrados, mercenarios, vendidos, trepas, incapaces, acomplexados, semi-analfabetos….E posible que vostede teña razón, máis para saír de dúbidas probe o seguinte.
A) Localice a un amigo ponderado, razoable, intelixente (a ser posible) e que non estea involucrado en organizacións políticas. Se non ten ningún mírese ese problema, é grave. Se o ten pase ao punto B.
B) Cóntelle ao seu amigo as abismais diferenzas que o separan deses seus odiados compañeiros de organización. Analice a linguaxe corporal do seu amigo.
Os resultados posibles os seguintes:
I) Se vostede non é capaz de atender mentres fala ás reaccións do seu colega o mellor é que procure algunha droga relaxante que lle axude a sobrelevalo (Consello: Os gintonics son trendy).
II) Se, de repente, empeza a pensar que o seu colega é un pouco idiota repita o punto B con outro amigo. Se a súa impresión non varía procure axuda e, en caso de automedicarse, mire de conseguir prozac por internet.
III) Se empeza a ter a sensación de que vostede é un marciano, está de sorte, aínda está a tempo de voltar a ser unha persoa normal. Procure a súa forza interior, axudaralle a recuperar a harmonía.

Awamba Buluba

Fraga, In Memoriam

D. Manuel Fraga morreu a idade de 89 anos. Fundador do PP destaca por ser o dirixente Español máis comprometido cos seus concidadáns. Sempre conciliador, amable, dialogante, foi un home de gran intelixencia comprometido coa loita contra a violencia en xeral e contra a violencia de xénero en particular, como ben atestigou a súa viuva. Loitou dende os postos nos que estivo en contra da simplicidade na vida pública, a favor da cultura dos cidadáns. O seu gran servicio a España e a Galicia pasa polo afondamento na cultura democrática do país fuxindo sempre do caciquismno, o paternalismo e o clientelismo, corruptas fórmulas de poder que sempre lle anoxaron.

Sen dúbida foi o responsable da caída do réxime franquisa no que se infiltrou, loitando dende o ventre do dragón contra esa maldición que durante 40 anos devorou aos seus amigos demócratas.

Salvo o parchís non lle gustaban moito os xogos de mesa inda que era moi aficionado, xa nos últimos anos, ao geocaching: auténtica pasión sentía pola localización e dignificación dos cementerios ilegais que os comunistas españois se empeñaron en distribuir por cunetas de todo o territorio.

A súa etapa galega será lembrada pola modernización do país no que se invertiron inxentes cantidades de cemento, asfalto, ladrillo e alquitrán. A modernización de Galicia culminou co espectacular xiro de 360º que a cultura galega tomou tras a creación da magnífica Cidade da Cultura que centrou a Galicia no Universo e constitúe, actualmente, un referente da construcción cultural.

Heroico superviviente dun sinfín de atentados: chegou a sobrevivir tras ser arroxado dun 7º piso por policías franquistas, sufriu un atentado en Montejurra do que escapou ileso. Sen dúbida, un rosario de milagros que fan desta figura carismática un referente moral en Europa.

Amigo doutros grandes demócratas pais da patria como Castro ou Gadafi. Pai da Constitución que consolidou o bipartidismo de feito, e na que intuiu que o a extrema dereita tería o seu lugar democrático.

Xa nun plano máis persoal era un home honesto: dixo nunha ocasión que nunca poría un condón na súa vida e así foi.

DEP

Karina Flanagan

Optimismo!!!

González Pons, amigo e superfan de Inseminario, insinúa que pode haber algún español que non é idiota.

Lonxe de ser unha macarrada Inseminaria, ou un despiste, en realidade cremos que o noso colega abre unha porta á esperanza e nos ilumina co seu optimismo vitalista.

Graciñas Esteban!! Nos tamén estamos SuperAFavor do optimismo!!!

Cándido Voltaire Castiñeiras

Inseminario toma a BBC

Si, somos nos os que estamos detrás de esto.

Superafavor da sinceridade. Din que estamos tolos, que somos inmorais.... vale, pero quén di que non temos razón?

Alessio Rastani

SuperaFavor do Traje Regional

Mola supermazo o Traje Regional!!

Gracias Dolores, Gracias Gerardo! ímolo pasar tan tan ben!!

Sobre a importancia do lume

Moito se ten escrito sobre a importancia do dominio do lume para o desenvolvemento da humanidade. Sen embargo todas as teorías expostas ate agora eran banais. A verdadeira importancia do control do lume radica en que con el mellorou moito o churrasco.

El Tio Gilito